كان يامكان في قديم الزمان وفي سالف العصر والاوان.
كان هناك فتاة تدعى رقية .. تتميز رقية بجمال أخاذ فهي الاقل شطوبا بين زميلاتها ..
وهي اكثرهم بياضا بالنسبة للركب .. واقلهم اصفرارا بالنسبة للاسنان
كانت تعيش سعيدة في احيالتهم ( مزرعتهم)
وفي يوم من الايام راح ابوها يبي يجيب العلف من المزرعة ..
حاول حمل حزمة العلف .. عندما رفعها وجد تحتها جنيا فبخ به الجني فخر صريعا على خشته <<< ما اعرف لسميلاتكم
لحــــــظة
هونت ابوها مامات وش لون يصير لها مرة ابو؟؟
اذا فالذي راح للمزرعة ومات اكتشفنا انها امها لكن الترجمة لم تكن دقيقة
ماتت ام رقية .. وشعرت بحزن غامر ماتدري وش اتسوي .. فتصافقت بها الجدران ...
جاءابو رقية ل
مها وقال لرقية انا لازم اعرس .
رقية : على راحتك يبة.
ابوها ..خلاص انا باخذ لطيفة ارملة ابو سعد.
قالت يبه بس هاذيك قشرا.
ابوها .. لا هذي اشاعات وبناتها مريم ومزنة بيصيرون مثل خواتك.
رقية .. اللي تبي يبه
تزوج ابو رقية وبعد شهر من فلة الحجاج
بدت مرة ابوها وبناتها تقل خاتمتهم ويحسرون برقية.:
ضاق صدر رقية وسكنوها في بيت الدرج .. والابو ماله سنع ..:
بينما لطيفة وبناتها ساكنين بأحسن غرفة والتي تطل على حوش البقر <<< حاسين الارتباط معهم .
_________________
مرت الايام ..
والى هكاليوم به حفلة في الخب الشمالي .. ..امسويها حاكم الخب من اجل انتقاء عروسا له.
قعدت رقية تصيح ودها تروح .. ومرت ابوها صاكتن عليها
اطلعوا للحفلة واتركوها ..
يوم صار بالليل
وتمر هذيك الفارة وتلحقها رقية بالنعلة تبي تكتلة ... اصرخت الفارة بقوة قائلة :
الفارة / اصبري وش بلاتس انتي ماتقرين قصص.
رقية / بلا قصص بلا هم هالحين ابلختس بهالنعله واطير راسك.
الفارة /وش بلاتس انا فارة متجنسة ( يعني فيها جني )
رقية / واذا صار يعني.
الفارة / انا راح اسوي لتس اللي تبين <<< اكيد لاحظتوا اللهجة.
رقية / وش بتسوين يعني
الفارة / مثل القصة اللي بالتلفزيون ابخليك كشخة وتروحين للحفلة.
رقية / يالله ورين اذا انتي صاتزة.
الفارة / طيب جيبي لي عنز واربع دجاج مندي << خطا مطبعي
وقرعة نجدي واوريتس.
راحت رقية وجابت له كل اللي تبي.
الفارة /// شرم برم لاتو فاتو جرام سرام ...
يوم صارت القرعة كاديلاك وصارت العنز شغالة.. وصارت حدى الدجاج سواق ...
وباقي الدجاج مالهن سنع فاضبطوا عليهن كبسة.:
افرحت رقية .. قالت الللللللله بس وشلون اروح وما عندي لبس.
قامت الفارة اسحرتها وحطت عليها ذاك اللبس :
التيور من آوت فيت <<< معليش دبة شوي
والجزمة من ميلانو.
والشنطة فندي <<< اصلية مو تقليد
والبوك جفنشي <<<< معليش مو زي الشنطة هذا المتوفر باسواق الجن.:
افرحت رقية واركبت وراحت للحفلة.
** قالت الفارة لرقية اسمعي الساعه احدعش <<< على باله بتيغير ...
لازم ترجعين والا تراني مانيب مسؤولة عن اللي بيصير.
* جت رقية للحفلة ..
يوم الفتت نظر كل الموجودين
ادحيم وعليان وعزيز والبرهم كلهم فقوا اخششهم من الدهشه نظر الامير الى رقية مدهوشا
ماهذا الجمال اللي يشق الجبهه
تبوسمت رقية وقالت تسلم الله يخليك
الامير إحول وفقد التركيز.
قال ممكن ترقصين معي
رقية : واخزياة والناس وش يقولون.
الامير : تكفين تراها قصة لاتخربينها
رقية خلاص تم.
ارقصت رقية مع الامير ونست الوقت.
مادرت الا المباراة اللي بالتلفزيون قاضية .. درت انها تاخرت.
كانت الساعة العاشرة وثمان وخمسون دقيقة .. طيط ..عند الاشارة << عفوا نسينا.
انقزت رقية وراحت تركض واثرها لابسة الزبيرية حقت اخوها الصغير <<< انتبهوا للصغير...
لان الجزمة اللي جابتها الجنية لها ضيقة عليها. .. اركضت رقية بالدرج .. وتنقطع الزبيرية وتطيح ..
** رقية ارجعت لبيتهم وهي مبسوووووووطة.
الامير اعلن انه يبي يتزوج راعية الزبيرية ..
من بكرا انزلوا الحاشية يدورون راعية الزبيرية ..
اكتشفوا ان نص هل الخب الشمالي تركب عليهم .. اوالله البلشة : <<< قالها الامير
جاب مستشاره وقال له وش الحل.
المستشار : ابد طال عمرك انشوف رجلين الحريم واللي مقاسها ست واربعين تراها هي
راحو يدورون ...
اكتشفوا ان معظم بنات الديرة مقاسهن تسع واربعين وفوق.
يوم اوصلوا بيت رقية ..
صكت عليها مرت الابو في بيت الدرج .. لم تسكت رقية فبدت تصارخ وتصيح افتحوووووووووولي ..
سمعها خوي الامير <<< المستشار.
قال جيبوها
قالوا هذي خبلة
قال ماهو شغلكم جيبوها ..
جت رقية والبست الزبيرية والاها قدها تمااااام ...
فرح الخوي وراح وبشر الامير.
تزوج الامير رقية .. وتهاوش معها عقب شهر وطلقها <<< اوالله الخاتمة.
مما سبق نستفيد التالي :
1/ القرع له فوائد عديدة.
2/ رقية شخصية مش خيالية.
3/ .. زين اذا كانت نعال اخوك قدك.
4/..القرعة ممكن تتحول الى كاديلاك.
5/..اذا بغيت تعرس لاتاخذ وحدة شايفينها بعرس .. وحاول انك تشوفها في الوضع الطبيعي ..
والا تراك تبي تطلقها .. الا اذا كانت <مدرسة>
الثلاثاء نوفمبر 09, 2010 1:03 am
